Një ngjarje e rëndë ka ndodhur mesditën e sotme në Tiranë. Pas një shkëmbimi me armë zjarri mes një punonjësi policie dhe një qytetari, kanë mbetur të plagosur agresori dhe një kalimtare. Një qytetar i pikasur nga një efektiv me përvojë i patrullës “Shqiponja”, nuk i është bindur kërkesës së policit për të paraqitur kartën e identitetit. Në këto momente ai ka nxjerrë nga çanta një armë zjarri dhe e ka kërcënuar policin se do ta qëllojë.
Polici i është përgjigjur dhe fillimisht ka qëlluar në ajër për ta trembur qytetarin, por përplasja ka vijuar dhe agresori ka mbetur i plagosur në këmbë. Ai aktualisht ndodhet në spital dhe është plagosur në pjesën e poshtme të trupit, në këmbë.
Në një komunikatë për mediat, Drejtori i Policisë së Tiranës u shpreh se të plagosurit ndodhen jashtë rrezikut për jetën.
“Një punonjës policie, i cili i kërkon dokumentet e identifikimit një qytetari, ky i fundit nuk i është përgjigjur. Në momentin që i ka kërkuar çfarë keni në çantë, qytetari është larguar me vrap. Punonjësi i policisë e ka ndjekur nga pas dhe sapo kalon pjesën e parë, qytetari i ka drejtuar armën punonjësit të policisë. Ky i fundit e ka paralajmëruar që ju lutem ulni armën se do t’ju qëlloj, dhe ka qëlluar njëherë në ajër sipas rregullores.
Qytetari ka lëvizur përsëri me vrap, dhe në kohën që punonjësi i policisë e paralajmëroi përsëri që të ulë armën të dorëzohet, ai ka drejtuar armën dhe i ka thënë policit do të qëlloj, nëse nuk largohesh. Ndërkohë punonjësi i policisë ka qëlluar në drejtim të tij dhe e ka plagosur.
Aktualisht ndodhet në spital, mendohet që është plagosur në pjesën e poshtme të trupit, në këmbë, por akoma nuk kemi një informacion të saktë. Në afërsi të kësaj skene ka qenë një qytetare e cila edhe ajo ka marrë një plumb në këmbë, nga punonjësi i policisë”.
