Një aksident thuajse i ka marrë jetën një të riu në Pogradec.
Pas përplasjes së dy automjeteve, shoferët janë konfliktuar me njëri-tjetrin, ndërsa në gjaknxehtësi e sipër, njëri prej tyre ka nxjerrë thikën dhe ka sulmuar tjetrin.
Autori është Marjo Xhangolli, 24 vjeç, i cili ka sulmuar me thikë shtetasin F.M, 28 vjeç, duke e goditur në pjesën e krahut me thikë.
Policia ka arrestuar Xhangollin, i cili akuzohet për “Vrasje me dashje, mbetur në tentativë”.
Njoftimi i policisë:
Specialistët e Seksionit për Krimet në Komisariatin e Policisë Pogradec, bënë kapjen dhe arrestimin në flagrancë të shtetasit :
Marjo Xhangolli, 24 vjeç, banues në Pogradec.
Arrestimi i tij u bë pasi, më datë 10.07.2017, në rrugën nacionale Pogradec-Korçë, në afërsi të fshatit Gështenjas, ky shtetas për motive të dobëta, ka goditur në pjesën e krahut me thikë, duke tentuar të vrasë shtetasin F.M, 28 vjeç, banues në Korçë. Ndërhyrja në kohë e shërbimeve të Policisë, parandaloi përshkallëzimin e mëtejshëm të këtij konflikti.
Ngjarja dyshohet të ketë ndodhur pasi shtetasit e mësipërm, janë konfliktuar me njëri-tjetrin, si pasojë e përplasjes me dëme materiale, të dy automjeteve konkretisht njëri me drejtues shtetasin F.M dhe tjetri me drejtues babain e shtetasit Marjo Xhangolli, në rrugën nacionale Pogradec-Korçë.
Në cilësinë e provës materiale u sekuestrua një mjet i mprehtë (thikë).
Materialet i kaluan Prokurorisë të Rrethit Gjyqësor Pogradec, për veprën penale: “Vrasja me dashje, mbetur në tentativë” parashikuar nga nenet 76 e 22 të Kodit Penal.
