Në zonën e Tushemishtit shkarkohen çdo ditë rreth orës 08.30 të mëngjesit sasi të mëdha uji të ndotur. Era e rëndë e ujërave të zeza është shumë e fortë në gjithë zonën dhe brenda pak minutave ujërat e zeza përhapen në gjithë zonën e bregut të liqenit madje dhe në fshatin Tushemisht ku ka disa plazhe.
Shkarkimet janë filmuar nga një pushues në Pogradec mëngjesin e kësaj të hëne. Ai shpjegon se shkarkime të tilla ka parë gjatë gjithë ditëve të qëndrimit të tij në qytet. Pushuesi ka treguar edhe se kujt i përket impianti që shkarkon ujërat e ndotura në liqenin e Ohrit.
Drejtori i Bordit të Kullimit, Ilir Cenolli tha për TCh se impianti varet prej tyre por bordi nuk ka kompetencë të kontrollojë ndotjen e ujit që derdh në liqen. Përveç ujërave të hidrovorit, aty derdhen edhe ujërat e përdorura të qytetit të Pogradecit.
Ujërat, të cilat përpunohen nga impianti i pastrimit të ujërave të zeza të qytetit thuhet se janë të padëmshme për liqenin. Uberto Toshi, drejtor i Agjencisë së Mjedisit thotë se disa muaj më parë ka pasur një defekt në sistemin e filtrimit që është riparuar dhe sipas tij pavarësisht ngjyrës së ujërave nuk përbëjnë ndotje për liqenin.
Kur u ndërtua impianti i pastrimit të ujërave të zeza në qytetin e Pogradecit, u tha se në liqen nuk do të derdheshin më mbetje. Ky hidrovor deri pak kohë më parë nuk shkarkonte ujëra me ngjyrë të errët në liqen. Situata ka ndryshuar së fundmi, por të alarmuar duken vetëm pushuesit dhe jo institucionet.
