Paul Pogba dukej i ngazëllyer për rikthimin në Torino, në stadiumin ku ka mjaft kujtime të bukura “Allianz Stadium”. Në konferencën për mediat në prag të sfidës ndaj Juventusit që do të zhvillohet të mërkurën mbrëma në kuadër të javës së katër të Champions ka pranuar se do të dëshironte të luante me Cristiano Ronaldon. Gjithashtu, kampioni i botës u është rikthyer edhe njëherë marrëdhenies me trajnerin portugez, teksa thotë se ka raporte lojtar-trajner, asgjë më shumë.
“Kush nuk do të donte të jetë në ekip me CR7-ën, Messi-n apo Neymar? Juventus ka bërë shumë mirë që e ka marrë atë, një si Cristiano është gjithmonë mirë ta kesh në ekipin tuaj.
Marrëdhëniet me Mourinho-n? Ashtu si gjithë të tjerët, nuk ka dallim. Ai është trajner dhe jo lojtar. Unë luaj rolin tim, bëj atë që thotë ai. Kjo është ajo që më pëlqen. Kush vendos, vendos trajneri, si dhe kush është kapiteni. Kjo nuk ndryshon asgjë për mua, përpiqem të luaj, të jap më të mirën për ekipin dhe për klubin. Këto mosmarrëveshje nuk më prekin aspak”.
