Mbrojtja e parcelave me kanabis, për pak i ka kushtuar jetën një personi. Një përplasje me armë zjarri ka ndodhur dje në fshatin Gjorgoz të Njësisë Administrative Cakran të Bashkisë Fier, ku një shtetas ishte duke ruajtur një parcelë të mbjellë me kanabis. 29-vjeçari Griseld Shpataraku, që u përplas me Policinë e Shtetit dje në Cakran të Fierit, është transportuar me urgjencë drejt spitalit të Traumës në Tiranë. Burimet bëjnë me dije se ai është në gjendje të rëndë pas plagosjes nga policia, ku mori një plumb në shpatull.
Si ndodhi plagosja me armë zjarri?
Policia njoftonte zyrtarisht me anë të një deklarate për mediat, se 29-vjeçari ishte duke punuar në një parcelë që kishte mbjellë me kubikë kanabisi, të cilat ishin gati për mbjellje në zonën e Cakranit në Fierit, në momentin kur një patrullë policie shkoi për kontroll. I riu nuk ka pranuar që uniformat blu të ushtronin kontroll, e për rrjedhojë ka rrëmbyer armën e zjarrit tip kallashnikov, ku dhe ka kërcënuar efektivët. Por policët kanë bërë neutralizimin e tij, duke e qëlluar me plumb në shpatull. Griseld Shpataraku është transportuar në spitalin e Fierit dje dhe tashmë pritet të marrë ndihmë të specializuar në kryeqytet.
Njoftimi i policisë:
Në zbatim të planit të masave për kontrollin e territorit, me qëllim parandalimin e kultivimit të bimëve narkotike, grupi i kontrollit të territorit, i përbërë nga punonjës të Policisë të Komisariatit të Policisë Fier, gjatë kontrollit të territorit, në një zonë të pyllëzuar të fshatit Gjorgoz të Njësisë Administrative Cakran të bashkisë Fier, ka konstatuar një person që mbante në dorë një armë zjarri kallashnikov.
Punonjësit e Policisë i kanë bërë thirrje personit që të hidhte armën dhe mos të lëvizte, por shtetasi ende i paidentifikuar nuk i është bindur urdhrit të Policisë dhe ka drejtuar armën e zjarrit nga punonjësit e Policisë, duke e mbushur atë me qëllim që të qëllonte në drejtim të tyre.
Shërbimet e Policisë kanë ndërhyrë për ta neutralizuar dhe për pasojë shtetasi ka mbetur i plagosur, për momentin jashtë rrezikut për jetën.
Nga këqyrja e vendit të ngjarjes rezultoi se në afërsi të vendit ku u konstatua shtetasi me armë kishte dhe fidanë cannabis sativa të kultivuar në kubikë.
Në cilësinë e provës materiale është sekuestruar edhe arma e zjarrit kallashnikov.
Në drejtim të vendngjarjes ka shkuar grupi hetimor, i cili në bashkëpunim edhe me SHÇBA, nën drejtimin e Prokurorisë, vijon punën për zbardhjen e plotë të rrethanave të ngjarjes dhe identifikimin e personit. / Tirana Today
