Një fëmijë 4 muajsh është infektuar nga koronavirusi. Rasti i rrallë është identifikuar në familjen e një emigranti në Codogno të Italisë, vendi ku ka një numër të madh vdekjesh dhe të infektuarish.
Me anë të një postimi në rrjetin social Facebook, shqiptari shprehet se dëshiron të japë sadopak kontributin e tij me informacione, duke bërë thirrje që në Shqipëri të tregohemi të kujdesshëm, dhe të mos e nënvlerësojmë situatën.
Ai tregon se jeton në të njëjtën pallat dhe të njëjtën shkallë me pacientin numër 1 që u zbulua në Itali. Fatmirësisht foshnja është mirë, me pak simptoma të cilat kanë kaluar.
“Miqtë e mi të Facebook-ut, dua të jap sadopak kontributin tim të paktë me informacion përsa i përket koronavirusit. Unë jetoj në qytetin e Codogno-s në Itali, nga i cili doli edhe për herë të parë epidemia e koronavirusit në të gjithë veriun e vendit dhe mbarë Evropën, dhe jetoj pikërisht në të njëjtin pallat dhe të njëjtën shkallë me pacientin numër 1 që u zbulua në Itali”.
Emigranti shqiptar, me këtë apel të hapur, bën thirrje që të mos e nënvlerësojmë situatën, por të vetëndërgjegjësohemi.
“Mua pardje m’u komunikua nga doktorët që djali im 4-muajsh është infektuar me koronavirus. Falë Zotit ai është mirë, me pak simptoma që kanë kaluar, ne të gjithë këtej mund të jemi të infektuar, sepse jetojmë në zonën më të prekur të Italisë dhe pikërisht në pallatin më të infektuar pa asnjë lloj simptome, por gjithsesi kur merr lajme të tilla për fëmijën apo familjarin, të shembet bota nga poshtë.
Nuk po e bëj këtë status as për like e as për komente, sepse nuk do përgjigjem, thjesht dua që t’ju them të paktën juve miq që jeni në Shqipëri që bëni kujdes, mos e nënvlerësoni aspak situatën sepse prindërit, gjyshërit tonë janë në rrezik total.
Kam dhe një vajzë 4-muajshe në shtëpi, dhe po e provoj në familjen time këtë situatë stresuese. Kështu ju bëj thirrje mos e nënvlerësoni situatën. Nëse dikush do të bëjë share këtij posti që njerëzit sadopak të ndërgjegjësohen, mund ta bëni”, shkruan emigranti.
Pak më herët, kryeministri Rama tha se do të ashpërsohen ndëshkimet për ata që nuk iu binden masave të marra nga qeveria, për situatën e koronavirusit.
Deri në këto momente janë konfirmuar pozitivë me COVID-19, 33 raste, nga të cilat: 8 prej të cilëve janë të shtruar në spitalin Infektiv (nga Tirana, Durrësi, Fieri dhe Rrogozhina) 25 raste janë të vetëizoluar në gjendje të mirë shëndetësore në shtëpi.
