Pronarët dhe administratorët e mjeteve lundruese kanë dalë protestë para policisë kufitare në Vlorë, për shkak të masave drastike të ndërmarra pas aksidentit tragjik të pak ditëve më parë në Himarë. Komisari Arjan Tase përplasi për vdekje 7-vjeçaren Jonada Avdia, teksa drejtonte gomonen. Protestuesit shprehen të revoltuar se janë bllokuar për shkak të një aksidenti, dhe se pa këtë aktivitet, ata nuk po sigurojnë fitime.
“Na kanë bërë një padrejtësi që po na lënë pa bukë”, kanë thënë pronarë e administratorë të mjeteve lundruese në Vlorë, të cilët kanë dalë mëngjesin e kësaj të shtune në protestë.
“Bashkohemi me dhimbjen e familjes që humbi vajzën në atë aksident tragjik që është një tragjedi, që të gjithë e kuptojnë. Por si pasojë e saj na kanë bërë një padrejtësi që po na lënë pa bukë. (..) Nëse i ka njeri afër plazhit mjetet, t’ia sekuestrojnë. Nëse vrau njëri dikë, duhet ta pësojmë neve? Këta po ruajnë postet e tyre për të ushqyer fëmijët e tyre, por ne t’i lëmë rrugëve? Si të paguaj kredinë, si t’i jap rrogën punonjësve?”, është shprehur një protestues, shkruan “Shqiptarja”.
Për shkak të ngjarjes tragjike në Himarë, asnjë mjet lundrues duke filluar që prej ditës së djeshme nuk do të dalë dot në det. Vendimi i konfirmuar më 5 gusht nga drejtori i ri i drejtorisë së Kufirit të Vlorë, Eduart Sulejmani nxiti edhe revoltën e qytetarëve të Vlorës, të cilët dolën sot përpara policisë kufitare. Sulejmani u shpreh se mjetet lundruese që të lëvizin në det, duhet të kenë një sërë dokumentesh, që nga ato të mjetit, licencë turistike, NIPT të regjistruar në QKR, kontratë me zyrën e punës, të jenë të siguruar etj. Nëse do të mungojë qoftë dhe një dokument, do të merren masa administrative deri në bllokim të mjetit lundrues.
