Para se të vritej me një breshëri automatiku, ish oficeri i policisë Arben Bilali, është mbajtur në vëzhgim për 1 javë nga atentatorët. Referuar të dhënave të përcjella nga grupi hetimor, nga kamerat e sigurisë rezulton se një motor dhe një automjet tjetër, qëndronin pranë shtëpisë së ish-policit.
15 të shoqëruar në polici
Nga 15 personat e shoqëruar, blutë e Tiranës kanë në dorë një dëshmi të vlefshme, të njërit prej miqve të Arben Bilalit. Ai u ka thënë hetuesve se disa ditë para ngjarjes, ka qënë duke udhëtuar me Arben Bilalin, dhe ka parë një makinë të zezë që po i ndiqte.
Dëshmitari i ka thënë edhe ish-policit se dikush po i vëzhgonte, dhe të dy kanë vendosur që të thërrasin disa miq të tjerë. Por më pas makina e zezë ishte larguar. Dëshmitari i ka dhënë policisë edhe targën e makinës.
Ndërkohë nga kamerat e sigurisë është identifikuar vetura që u përdor nga atentatorët, Benz me targë AA 757 RV. Kjo targë i përket një makine Fiat Punto në Vlorë, por që pronari ka bërë denoncim se ja kanë vjedhur në gusht të 2017-së.
Mes personave të pyetur janë edhe anëtarë të familjes Xhabafti, me të cilët familja Bilali ka patur konflikt që prej vitit 1997-të. Anëtarët e familjes Xhabafti kanë mohuar se kanë lidhje me ngjarjen.
S’ka prova të mjaftueshme
Arben Bilali sapo kishte zbritur nga makina e një shoku, kur atentatorët janë afruar dhe kanë qëlluar më shumë se 15 herë drejt tij.
