Deputeti i Lëvizjes Vetëvendosje i cili është edhe kryetar i zgjedhur i Komunës së Gjilanit, Alban Hyseni, ka dhënë dorëheqjen nga posti i deputetit në Kuvendin e Kosovës. Me anë të një postimi në rrjetet sociale, ai njofton se e pret një detyrë e re, dhe një kapitull i ri si i pari i Komunës së Gjilanit.
“Sot firmosa dokumentin e dorëheqjes nga pozita e deputetit. Ju faleminderit të gjithë kolegëve pa dallime partiake, për bashkëpunimin gjatë kësaj periudhe. Tani na presin detyra të reja dhe hapjen e një kapitulli të ri për Komunën e Gjilanit”.
Ai ka fituar në balotazhin e 14 nëntorit ndaj Lutfi Hazirit, të Lidhjes Demokratike të Kosovës.
Hyseni ka marrë besimin e 21 mijë e 374 qytetarëve, duke e lënë pas kandidatin e tij nga LDK, Lutfi Hazirin, për 859 vota më shumë.
