Ekzekutimin me një plumb pas koke 36-vjeçarit, policia greke e ka cilësuar si larje hesapesh. Ngjarja e rëndë ka ndodhur në orët e para të ditës, më 15 gusht në Athinë. Sipas hetimeve nga autoritetet greke, shqiptari nuk kishte precedentë penal, nuk rezultonte në asnjë dosje të policisë, dhe madje nuk kishte bërë ndonjëherë ankesë në polici për çështje të ndryshme.
Shqiptari, emri i të cilit nuk bëhet me dije, kishte pak ditë që ishte kthyer nga pushimet në Naksos, ku kishte qenë me familjen, bashkëshorten shtatzënë dhe fëmijën e mitur.
https://tiranatoday.com/larje-hesapeshekzekutohet-me-plumb-ne-koke-nje-36-vjecar/
Përjashohet pista e grabitjes
Hetuesit të cilët kanë zbardhur dinamikën e ngjarjes, kanë zbuluar se celulari dhe portofoli i viktimës nuk ishin marrë nga autori i vrasjes.
Vrasje me pagesë
Policia është fokusuar në pistën e një vrasje me pagesë. Dyshohet se 36-vjeçari ishte zënë në pritë, pasi ishte qëlluar me një plumb pas koke.
Shqiptari u ekzekutua kur po kthehej në shtëpi
36-vjeçari u vra kur po kthehej në shtëpi. Ai u gjet i vdekur në kryqëzimin e rrugëve Marki dhe Parnithos, në lagjen Kypseli, poshtë pallatit të tij, ku në banesë e prisnin gruaja dhe fëmija.
Dyshohet se shkak për vrasjen mund të jetë bërë ndonjë konflikt personal i viktimës me autorin, apo përfshirja e mundshme e tij në veprimtari kriminale, të tilla si trafik droge. Por nga hetimet e deritanishme nuk ka shenja për një aktivitet të tillë. Policia e Athinës është duke vijuar hetimet, për të identifikuar ekzekutorin dhe për të zbardhur shkaqet.
