Me termin “plis” në gjuhën shqipe kuptojmë një copë dheu, që shkëputet kur hapet brazda për mbjellje. Ndërkohë plisi është edhe veshja tipike që mbajnë në kokë shqiptarët ndër shekuj, nga veriu në jug, e nga lindja në perëndim.
Historianë dhe studiues të ndryshëm, e kanë ndeshur plisin tek shumë popujt të tjerë të lashtë. Por mendojnë, se ai më së pari ai është përdorur nga paarardhësit më të vjetër të shqiptarëve, pellazgët, mijëra vjet para lindjes së Krishtit. Albanologu Georg von Han, thotë se plisi tek shqiptarët lidhet me hyjnizimin e Tokës.
Ndërkohë një legjendë shumë e përhapur thotë se plisi, simbolizon gjysmen e vezës hyjnore, nga doli Zoti që krijoi më pas çdo gjë, përfshirë edhe Tokën. Kjo lidhet me një traditë që ekziston ende në shumë treva shqiptare. Kur nusja hyn për herë të parë në shtëpinë e dhëndrit, ajo duhet të ulet mbi një plis të kthyer mbrapsht, dhe të vendosë një tjetër plis mbi kokë. Me këtë traditë kulturore, shqiptarët nuk bëjnë gjë tjetër, përveçse shprehin nje skenë të Gjenezës, pra të fillimit të jetës. Me kalimin e kohës, plisi po mbahet më rrallë, kryesisht në raste festash kombëtare. Ndërkohë vitet e fundit, në shumë krahina kremtohet përmes festivaleve edhe Dita e Plisit.
