Kukësi është duke kaluar një moment aspak të mirë në këtë fillim kampionati pasi është mposhtur 1-0 nga Partizani. Trajneri Armando Cungu pas kësaj humbje është shprehur para kamerave i zhgënjyer nga futbollistët e huaj, duke i akuzuar se nuk jepnin maksimumin. Duket se ai i drejtohej Rexhinaldos, sulmuesit që ka shënuar 5 gola në 7 ndeshje, pa harruar që sapo u bashkua me verilindorët shënoi dy gola në Europa League përballë Torpedos, por që nuk e ndihmuan për kualifikimin. Ndërsa në sezonin që lamë pas sulmuesi nga Mozambiku kishte shënuar 21 gola për Laçin.
Pas ndeshjes kundër Partizanit trajneri shkodran foli në Supersport dhe lëshoi një deklaratë të çuditshme, duke sulmuar hapur Rexhinaldon: “Do ta shikojmë situatën. Më mirë të humbasim me një lojtar vendas, por të jetë djalë i ri dhe të ketë dëshirë për të luajtur futboll, sesa me të huajt”.
Sulmuesi afrikan ka reaguar ashpër, sepse i pyetur nga Panorama-Sport në lidhje me deklaratën e Cungut ai tha: “Humbëm ndeshjen dhe trajneri fajëson mua? Kam luajtur i sëmurë për Kukësin, por me sa duket kur fitojmë Rexhinaldo është më i miri, ndërsa kur humbasim Rexhinaldo është më i keqi. Kjo nuk është korrekte.
Më vjen keq, por nëse trajneri ka diçka për të sqaruar me mua, të ma thotë në sy, ose në telefon, jo të kritikojë nëpërmjet televizionit. Sa për statistikë, tre fitore kanë ardhur nga golat e mi”.
