Kur na ndajnë dhe 5 ditë nga starti i Botërorit të Rusisë, situata në kampin e kampionëve në fuqi të botës nuk është aspak e qetë. Në ndeshjen miqësore të zhvilluar një natë më parë mes Gjermanisë dhe Arabisë Saudite tifozët nuk kanë qenë aspak të qetë dhe kanë shpërthyer në vërshëllima ndaj mesfushorit të Manchester Cityt, Gundogan.
Mbrojtësi i Gjermanisë, Mats Hummels, beson se tifozët kanë bërë një sjellje të gabuar ndaj Ilkay Gundogan në momentin kur ai u inkuadrua në fushën e lojës. Gundogan dhe Mesut Ozil i Arsenalit, të dy me origjinë turke, kanë tërhequr kritika për takimin e tyre të fundit në Londër me presidentin Rexhep Tajip Erdogan të Turqisë, i cili është subjekt i shqyrtimit nga grupet e të drejtave të njeriut.
“Tifozët nuk duhet t’i vërshëllejnë ndërkombëtarët e Gjermanisë gjatë një loje. Veçanërisht kur ka një atmosferë kaq të mirë, si në fillim,–u tha gazetarëve Hummels.–Ishte një atmosferë e këndshme për një miqësore, por tifozët dukej sikur ishin duke pritur derisa Ilkai të merrte topin dhe ta vërshëllente. Unë nuk mund të jem i kënaqur me këtë dhe shpresoj të mos ndodhë më, sepse të gjithë në këtë tokë gabojmë një herë”.
Edhe Marco Reus, i cili luajti së bashku me Gundogan te Borussia Dortmund, iu bëri jehonë mendimeve të Hummelsit: “Unë nuk mund t’i kuptoj vërshëllimat kundër Ilkai. Nëse e patë në dhomën e zhveshjes, kjo e ka prekur atë thellë. Ai nuk e meriton atë, ndaj do të qëndrojmë pranë tij me siguri”.
Federata Gjermane e Futbollit i qortoi dy futbollistët se u shfrytëzuan nga një “marifet i fushatës zgjedhore”, ndërkohë që turma e “BayArena” shprehu mospëlqimin e vet të premten. Hummels, megjithatë, inkurajoi tifozët që të lëvizin nga episodi dhe të bashkohen mbas ekipit kombëtar, ndërsa ata do të përpiqen të mbrojnë kurorën e Kupës së Botës, në Rusi.
