Ambasadori i Britanisë së Madhe në vendin tonë Duncan Norman u shpreh i shqetësuar rreth ndikimit rus në rajonin e Ballkanit. Si shembull ai mori incidentet e ndodhura në Malin e Zi para pak kohësh.
Ndërkohë ambasadori u tregua i kujdesshëm dhe preferoi të mos komentonte çështjen e lobistëve rusë, që kanë nxitur debat mes Partisë Demokratike dhe mazhorancës.
“Nuk do të komentoj mbi akuzat që bëhen mes PS-dhe PD sepse nuk do të ishte korrekte nga ana ime, por mund të them se jemi të shqetësuar mbi një aktivitet më të gjerë rus në rajon duke përfshire edhe atë që ndodhi në Malin e Zi kohë më pare”, u shpreh ambasadori Norman.
Këtë deklaratë ambasadori e dha gjatë një takimi me gazetarët. Në këtë tryezë u diskutua gjerësisht lidhur me atentatin ndaj ish-agjentit rus Sergei Skripal dhe vajzës së tij. Ai tha se hetimet kanë nxjerrë dy konkluzione rreth përgjegjësisë së Rusisë.
“Britania e madhe e ka hetuar në mënyrë të tërësishme këtë incident. Sergei Skripal dhe vajza e tij Julia u helmuan me një agjent nervor ushtarak zhvilluar nga Rusia. Bazuar në hetimet tona qeveria britanike ka arritur në përfundimin se ka shumë të ngjarë që Rusia është përgjegjëse për këtë akt kundër Sergeit dhe vajzës së tij. Arritëm në përfundimin se janë vetëm dy shpjegime të mundshme. Ose ky ka qenë një akt direkt nga shteti rus kundër vendit tonë ose qeveria ruse ka humbur kontrollin e këtij agjenti nervor mjaft të rrezikshëm duke lejuar që të bjerë në duart e të tjerëve. Ministri ynë i jashtëm Boris Johnson thirri ambasadorin rus dhe i kërkoi që të japë shpjegime mbi këto dy alternativa”.
