Biznesmeni Nikollaq Neranxi, njëkohësisht kreu i Shoqatës për Mbrojtjen e Shtëpive, Pronave, Historisë dhe Kulturës Himarë, ka reaguar për mbledhjen e ditës së mërkure të këshillit Bashkiak të Himarës. Këtë mbledhje, Neranxi e quan mbledhje “të hajdutëve dhe frikacakëve”.
Neranxi i ka nisur një letër Këshillit Bashkiak të Këshillit të Himarës ku paraqet një ankesë/kërkesë për refuzimin e miratimit të Planit të Përgjithshëm Vendor të Bashkisë Himarë dhe kthimin e tij për rishqyrtim autoritetit propozues pasi nuk është respektuar procedura e detyrueshme e planifikimit sipas përcaktimeve ligjore.
“Në mënyrë tinzare, sjellje tipike e atyre që janë në shërbim të pushtetit dhe oligarkisë, por duke treguar edhe frikën nga përballja me popullin, Kryetari i Bashkisë Goro, bën një veprim shumë të shëmtuar. Ai vendos që nesër, mbledhjen e Këshillit Bashkiak ta zhvillojë në Kuc, 140 km larg selisë së Bashkisë. Të kërkosh të përjashtosh komunitetin nga vendimmarrja, kur flitet për fatin e zonës së tyre, ndërkohë që ata e kanë kundërshtuar atë plan për disa mbledhje me radhë, përbën shkelje të së drejtës Kushtetuese dhe grabitje e hapur të pronave dhe historisë së tyre”, shkruan Neranxi.
