Në një kohë kur Lulzim Basha dhe Monika Kryemadhi, të mbështetur në prapaskenë nga Sali Berisha dhe Ilir Meta, kanë paralajmëruar një tjetër protestë masive kundër qeverisë së lidhur me krimin, edhe Edi Rama ka një plan B, për të mbrojtur pushtetin deri në fund.
Burime pranë shumicë kanë bërë me dije se do të shikohen mundësitë dhe hapësirat në legjislacion, për angazhimin e ushtrisë për shtypjen e kryengritjes së opozitës, e cila kërkon të marrë pushtetin dhe t’i shpëtojë SPAK-ut.
Nëse opozita do të përshkallëzojë aktet e dhunës dhe situata do të dalë jashtë kontrollit, Policia e Shtetit nuk ka kapacitete për të garantuar institucionet dhe përfaqësuesit e qeverisë.
Një skenar të tillë e kanë diskutuar edhe Sali Berisha dhe Arben Imami pas protestës së dhunshme të 21 Janarit, kur u vranë 4 qytetarë të pafajshëm dhe u plagosën edhe 6 të tjerë. Në atë kohë, Prokuroria kërkoi arrestimin e zinxhirit të Gardës së Republikës për vrasje me urdhër të Sali Berishës.
Ky i fundit refuzoi të zbatonte urdhër-arrestet, me anë të policisë. Berisha tha në atë kohë se ky ishte një skenar i Ina Ramës, Edi Ramës, Bahri Shaqirit dhe Bamir Topit, për t’i goditur Gardën dhe për t’i marrë pushtetin. Në këto kushte, nisi diskutimi i planit për të vënë në lëvizje ushtrinë. Por, ky plan nuk u zbatua, pasi situata ndryshoi.
Ka dyshime të forta se e gjithë kjo situatë mund të jetë një lojë e të gjitha palëve politike për të sabotuar çeljen e negociatave në qershor dhe për t’i dhënë një mesazh Perëndimit dhe drejtësisë së re. Çelja e negociatave në qershor do të ishte një goditje e rëndë për të gjithë klasën politike shqiptare, pasi vendi hyn në një fazë të re llogaridhënie dhe zbatimi standardesh.
Por, ky është vetëm rreziku i parë dhe më minimal. Rreziku më i madh për klasën politike është ngritja e SPAK-ut. Ndaj, destabilizimi i vendit është edhe mundësia e fundit për mafien politike për t’i shpëtuar SPAK-ut, skenar i cili ka pak gjasa që të ndodhë./Pamfleti
