Pas plagosjes së 77-vjeçarit, Haxhi Lika, gjatë një aksioni të RENEA-s, një reagim është përcjellë edhe nga SHBÇA, ku citon se ka nisur verifikimin për të sqaruar rrethanat e plagosjes dhe nëse veprimet e policisë ishin konform rregullave.
77- vjeçari Haxhi Lika, i cili mbeti i plagosur gjatë një aksioni të forcave RENEA në Divjakë, në fshatin Rremas, në një intervistë për ‘Fax News’ zbuloi edhe si ndodhi ngjarja. Ai ka thënë se e ka qëlluar policia, dhe se nuk është e vërtetë se ka dalë për t’iu kundërpërgjigjur me çifte.
“U ngrita herët në mëngjes, për të përgatitur ushqimin e lopëve. Ne ishim brenda në dhomë, u ngritëm. Erdhi policia, dola në dritare për të parë se çfarë do të ndodhte dhe aty thirrën policia. Dola në dritare, ngrita grilat dhe aty më qëlluan. Më qëlloi policia. Nuk është e vërtetë që kam dalë me çifte”.
I moshuari ndodhet në spitalin e Traumës, në Tiranë. Ai hedh poshtë hipotezat se ka lidhje me personat që kërkoheshin nga ana e policisë. “Më çuan në Lushnje ku mora mjekimin, dhe më pas në Tiranë. Në Lushnje me bënë dhe skaner. Unë nuk kam strehuar persona të dyshuar në banesë. Unë nuk i njoh personat që kërkon policia”.
