Të majtë e të djathtë sot kanë gjetur gjuhën e përbashkët, si rrallë-herë dhe kjo ka ndodhur pasi është përuruar busti i ish-kreut të Kuvendit të Shqipërisë, Pjetër Arbnori. U bë një kohë e gjatë që Garda e vjetër në Partinë Demokratike i ka kthyer shpinën Bashës, e ndërsa ky i fundit, vijon me agjendën e tij pa kthyer kokën pas.
Astrit Patozi, Majlinda Bregu, Arben Imami dhe një numër të tjerë demokratësh të pakënaqur shprehën rebelimin kohë më parë ndaj kreut demokrat, por sot u reflektua një situatë e paqtë, e ndërsa gjakrat mes palëve duket se janë ulur.
Gjatë ceremonisë së zhvilluar në oborrin e Kuvendit, kanë qenë të pranishëm edhe politikanë të cilët janë larguar nga politika aktive.
Ndryshe nga çfarë ofrojnë në Kuvend, sherre, teatër, akuza e kundër-akuza, të majtë e të djathtë sot kanë dhuruar një “shfaqje”, ku të gjithë do i kishin zili. Kreu demokrat është fotografuar teksa i jepte dorën Gramoz Ruçit, e në një tjetër foto duket ish-kryetarja e Kuvendit, Jozefina Topalli, e cila bisedon me Pandeli Majkon dhe Gramoz Ruçin.
Të vjetrit e Partisë Demokratike nisën luftën me Lulzim Bashën, pas përjashtimit nga lista e kandidatëve. Vendimi i kreut demokrat për të mos kandiduar një sërë emrash të njohur në PD, nuk u prit aspak mirë prej tyre, dhe Garda e vjetër nisi menjëherë tentativat për të shkarkuar Bashën para zgjedhjeve.
