Oficerët e Krimeve të Rënda kanë ngritur edhe pistat e para hetimore pas vrasjes mafioze te avokatit Ravik Gurra mbrëmjen e djeshme në Elbasan.
Pista e parë mësohet se është ajo e një vrasjeje të mundshme për shkak të detyrës.
Por, nuk përjashtohet si mundësi edhe fakti që avokati 50-vjeçar ishte mik i familjes Çapja në Elbasan, të cilët herë pas here kanë qenë të përfshirë në ngjarje të ndryshme kriminale.
Megjithatë, burimet thonë se po punohet për pista të tjera hetimore, të cilat do të vlerësohen edhe pasi t’u merret deklarim familjarëve të tij apo miqve.
Deri më tani, hetimet janë përqendruar te detyra e tij si avokat, ndërsa ekziston mundësia që autorët të jenë vrasës me pagesë, të cilët mund të kenë marrë porosi nga persona të tjerë për eliminimin e avokatit.
