Gerard Pique ka vendosur të dërgojë një deklaratë zyrtare për mediat, ku njofton veprimet ligjore. Ai ka bërë thirrje që të respektohet privatësia e tij, duke kritikuar disa media vendase dhe ndërkombëtare dhe ngacmimet e paparacëve ndaj tij dhe familjes së tij. Gerard Pique ka paralajmëruar se do të ndërmarrë edhe veprime ligjore nëse nuk ndalojnë.
Futbollisti ka qenë kryefjalë e mediave që kur ai dhe Shakira njoftuan më 4 qershor se po ndaheshin pas 12 vitesh së bashku. Që atëherë, ka pasur raporte të ndryshme për çiftin, kujdestarinë e fëmijëve të tyre dhe jetën e re të lojtarit me Clara Chia.
Deklarata e plotë e Gerard Pique
“Që kur Shakira dhe Gerard Pique konfirmuan ndarjen e tyre në një deklaratë të përbashkët më 4 qershor, ka pasur thashetheme të ndryshme dhe informacione të paverifikuara të publikuara për lojtarin, familjen e tij dhe jetën e tij personale, dhe rrjedhimisht, private”, thuhet në deklaratë.
“Këto raportime dhe pamje jo vetëm që dëmtojnë nderin dhe imazhin e tij, por cënojnë rëndë edhe të drejtat e fëmijëve të tij, siguria dhe mbrojtja e të cilëve është shqetësimi i tij kryesor. Përgjimi nga disa media dhe paparacët ka qenë i vazhdueshëm, duke e detyruar klientin tonë të ndryshojë rutinën e tij të përditshme me të vetmin qëllim për të mbrojtur fëmijët e tij, familjen dhe të afërmit e tij. Gerard Pique ka respektuar gjithmonë veprimtarinë e mediave dhe të drejtën e tyre për të publikuar informacion, dhe është plotësisht i vetëdijshëm për rolin themelor që luan media në shoqërinë tonë”.
“Megjithatë, javët e fundit ka pasur ndërhyrje që i tejkalojnë kufijtë e ligjshmërisë, ndaj klienti ynë ka qenë i detyruar të kërkojë urdhra ndalimi dhe të marrë masa ligjore ndaj atyre që po i prishin jetën familjare dhe i shkelin të drejtat e fëmijëve të tij. Objektivi i vetëm i Pique është të sigurojë mirëqenien e tyre, dhe të rivendosë të drejtat e tyre për privatësi, siguri dhe paqe mendore. Përmes kësaj komunikate, klienti ynë dëshiron të falenderojë për respektin dhe ashpërsinë informative që kanë treguar disa media, dhe beson se gjithçka do të zgjidhet në mënyrën më të mirë të mundshme, me mbizotërimin e arsyes së shëndoshë”.
Burimi i lajmit: MARCA. Përshtatur nga Tirana Today
