Ngjarja e rëndë e Greqisë, vijon ende të trondisë opinionin publik, ndërsa të dhënat janë shokuese. Vrasësi Charalambos Anagnostopoulos i është përshtatur jetës në burg, ndërsa ka dhënë pëlqimin e tij që kujdestarinë e vajzës e kanë marrë prindërit e së ndjerës Caroline Crouch.
David Crouch, babai i 20-vjeçares ka folur ditë më parë lidhur me dyshimet se piloti vrasës ishte gjithashtu i lidhur me kontrabandën e drogës. Sipas tij, Caroline bënte një ndarje ideale të së mirës dhe të gabuarës, dhe do ta kishte kërcënuar se do ta linte nëse ai ishte i përfshirë.
Por duket se këto nuk janë thjeshtë dyshime, pasi hetuesit duket se janë të mendimit se Babis merrej me trafikun e drogës, dhe ka vrarë bashkëshorten kur ajo e ka pikasur.
Policia greke ka dyshime se piloti që vrau gruan e tij angleze dhe pastaj deklaroi se krimin e kishin kryer grabitësit që i hynë në shtëpi, mund të ketë qenë transportues droge i karteleve. Ai e ka mbytur bashkëshorten, kur ajo e ka zbuluar.
Ky dyshim ka lindur pasi hetimet mbi të ardhurat e grekut treguan se ai bënte një jetë luksoze, pavarësisht se paga si pilot nuk ishte edhe aq e lartë.
Kohët e fundit, çifti kishte blerë një tokë me vlerë rreth 60 000 euro, një shtëpi mbi 150 000 euro dhe sapo kishin kaluar pushime luksoze në Dubai.
Sipas policisë greke, Charalambos Anagnostopoulos, që njihet me emrin Babis, ka pasur një burim tjetër të ardhurash, dhe e vrau gruan e tij 20-vjeçare kur ajo e mori vesh se nga vinin paratë.
Hetuesit gjetën në shtëpinë e çiftit një ditar të koduar, të cilën e mbante Caroline. Babai i vajzës, David i beson disa prej shkrimeve në mediat greke që pretendojnë se Babis mund të jetë marrë më trafik lëndësh narkotike. “Carolina kishte parandjenja të forta; ajo e kuptonte menjëherë nëse diçka nuk ishte në rregull. Ndoshta e ka zbuluar që i shoqi merrej me drogë, ndaj e kërcënonte më divorc”, ka thënë David.
Policia e mori pilotin gjatë ceremonisë mortore të Caroline, ndërsa prindërit nuk kishin dyshuar tek vrasësi. “Kur e mësova këtë më vonë, i vetmi peng që më mbeti ishte që nuk e kuptova vetë më parë. Do t`ia kisha këputur kokën aty në atë moment, pavarësisht pasojave”, ka thënë më tej David, i cili rrëfeu dhe momentin kur i dhanë lajmin e kobshëm të vdekjes së të bijës. “Ishte sikur një dorë e akullt hyri në kraharorin tim, e ma shkuli zemrën. Ajo ishte dita më e keqe e jetës sime”, u shpreh ai.
Charalambos Anagnostopoulos u arrestua pasi mbyti të shoqen, dhe u mundua ta fshihte krimin, duke sajuar një grabitje. Ai tregoi në polici një histori të sajuar, ku përfshiu dhe shqiptarët.
