Bashkimi Evropian ka vënë në dispozicion të sektorit të peshkimit shumën prej 3.4 milionë euro, si dhe ka hapur thirrjen për aplikimin e institucioneve me qëllim përfitimin e granteve.
Nga totali, 1.9 milionë euro duhet të shkojnë për asistencë teknike, 100 mijë euro për furnizime për administratën e peshkimit dhe 1.4 milionë euro për zbatimin e skemës së granteve.
Përmes granteve të vogla, peshkatarët do të kenë mundësi të përmirësojnë elementë të ndryshëm, si sistemet e navigimit, sigurimi i ushqimeve (frigoriferë), përmirësimi i pajisjeve për peshkimin si dhe në uljen e ndotjes.
Mësohet se grantet për individët do të jepen përmes një pale të tretë, që do të përfitojë nga fondet e BE dhe do të jenë të limituara në 60 mijë euro.
Gjithashtu, këto grante nuk duhet të mbulojnë më shumë se 50% të vlerës së investimit.
Afati i institucioneve publike për të aplikuar është deri më 11 shtator.
