Presidenti i Forumit Ekonomik Botëror Borge Brende ka treguar 5 rreziqet nga të cilat rrezikohet bota në dekadën e re. Sipas tij, ekonomia botërore do të përballet me rreziqe në 10 vitet e ardhshme si, fatkeqësitë natyrore, moti ekstrem dhe pasojat e ngrohjes globale.
Kjo është hera e parë në 15 vitet e fundit, ku forumi e ka tërësisht fokusin te rreziqet që kanosen nga natyra dhe ndikimi i njeriut për fenomene si grohja globale.
“Skena politike është e polarizuar, niveli i detit është duke u rritur dhe zjarret në natyrë duke u shtuar. Ky është viti kur liderët botërorë duhet të punojnë me të gjithë sektorët e shoqërisë për t’i riparuar dhe forcuar sistemet tona të bashkëpunimit, jo vetëm për përfitime afatshkurtra, por për luftimin e rreziqeve tona të rrënjosura”, tha Borge Brende.
Sipas këtij raporti, pesë rreziqet më të mëdha që i kanosen botës gjatë kësaj dekade janë:
– Moti ekstrem, i cili do të dëmtojë prona, infrastrukturë dhe do të shkaktojë viktima në njerëz;
– Dështimi në luftimin e ndryshimeve klimatike dhe mospërshtatja e qeverive dhe bizneseve ndaj këtyre ndryshimeve;
– Dëmtimet dhe fatkeqësitë natyrore të shkaktuara nga dora e njeriut, përfshirë krimin mjedisor, siç është kontaminimi me radioaktivitet;
– Humbja e madhe e biodiversitetit dhe kolapsi i ekosistemeve me pasoja të pakthyeshme për mjedisin;
– Fatkeqësitë e mëdha natyrore, siç janë tërmetet, cunamit, shpërthimet e vullkaneve dhe stuhitë gjeomagnetike.
