Sot janë zbuluar shtatoret e heronjve Shaban, Hamëz dhe Adem Jashari, në Drenas.
Me vendosjen e shtatoreve të figurave më emblematike, presidenti i Kosovës Hashim Thaçi nënvizoi se sheshi “Fehmi Lladrovci” po madhështohet.
“Në këtë shesh po vendosen emblemat e UÇK-së, identitetit dhe krenarisë së kombit shqiptar. Po vendosen shtatoret e kujtesës së krenarisë së kombit, por para së gjithash, edhe e mesazhit për të ardhmen e sigurt të shtetit të Kosovës dhe kombit shqiptar”, tha kreu i shtetit të Kosovës.
Po ashtu, në përurimin e shtatoreve të bashkëluftëtarëve ka marrë pjesë edhe shkrimtari Moikom Zeqo. I cili ka dhënë një intervistë për “Tirana Today”, që do të transmetohet ditën e nesërme. Mes të tjerash, Zeqo ka folur edhe për aktualitetin në Shqipëri dhe Kosovë, ku ka ndarë mesazhe të vyera.
Homazhet për simbolet e historisë janë bërë në kompleksin memorial “Adem Jashari” në Prekaz.
