Nga 1 Qershori ndryshon ligji i tatimit mbi të ardhurat. Kështu konfirmoi Ministrja e Financave dhe Ekonomisë, Delina Ibrahimaj. Ministrja i ka bërë thirrje tatimpaguesve për të mos kryer shkelje, ndërsa ka paralajmëruar përshkallëzimin e gjobave. Ibrahimaj pohoi se do të bëjnë ndryshimin në ligjin për procedurat tatimore, ku do të ketë gjobë 200% në totalin e shkeljeve për evazionin fiskal. Po kështu do të dyfishojnë gjobën për fshehjen e pagës për bizneset e mëdha.
“Dua t’i bëj thirrje të gjithë tatimpaguesve që të mos përdorin bonusin me qëllim fshehjen e pagesës së detyrimeve tatimore. Të mos përdorin forma të tjera pagesash, por ato që janë të parashikuara në ligj. Si tregu i sigurimeve ka dhe shërbime të tjera që kryhen në këtë formë. Kjo punë na shërbeu për të hedhur dritë aty ku duhet të punojmë.
Më 1 Qershor do të paraqesim ligjin e ri të tatimit mbi të ardhurat, i cili do të targetojë profesionet e lira, të cilat sot individët çelin biznese. Ia shesin bizneseve të tjera si shërbime duke eleminuar pagesën e taksave. Me ligjin e ri nuk do të jetë e mundur, sepse të gjithë profesionet e lira do të duhet të paguajnë tatimin mbi bazën e këtij ligji.
Ne kemi marrë masa për përshkallëzimin e gjobave. Do të bëjmë ndryshimin në ligjin për procedurat tatimore, tashmë do të ketë gjobë 200% në totalin e shkeljeve për evazionin fiskal. Do të dyfishojmë gjobën për fshehjen e pagës për bizneset e mëdha.
Do dyfishojmë masën për mos deklarimin e pagës së saktë. Do dyfishojmë gjobat, për mos deklarimin e punonjësve”, tha Ibrahimaj.
