Mijëra njerëz janë bllokuar në kufirin midis Polonisë dhe Bjellorusisë në kushte të tmerrshme, duke shkaktuar një mosmarrëveshje gjeopolitike në rritje. Emigrantët, shumica e të cilëve janë nga Lindja e Mesme dhe Azia, dhe që shpresojnë të udhëtojnë nga Polonia më thellë në Evropë, janë mbledhur në anën bjelloruse të pikës kufitare Kuznica. Autoritetet mbyllën kalimin të martën, me pamjet ajrore që tregojnë turma të mëdha që mblidheshin në zonë.
Organizatat bamirëse thonë se njerëzit e ngecur në zonën kufitare po luftojnë me motin e ftohtë, dhe nuk kanë ushqim dhe kujdes mjekësor.
Një azilkërkues sirian, i cili kohët e fundit mbërriti në Poloni pas përpjekjes së tij të tretë për të kaluar kufirin nga Bjellorusia, i tha CNN se me të mbërritur në kufi, rojet e kapën atë dhe tre të tjerë në grupin e tij. Ai u dhunua dhe pësoi lëndime në fytyrë, një hundë të thyer dhe brinjë të mavijosur.
Autoritetet polake thanë se shtatë emigrantë janë gjetur të vdekur në anën e Polonisë, me raporte për më shumë vdekje në Bjellorusi. Grupet humanitare po akuzojnë gjithashtu nacionalistët në pushtet në Poloni, për shkelje të së drejtës ndërkombëtare për azil duke i shtyrë njerëzit të kthehen në Bjellorusi në vend që të pranojnë kërkesat e tyre për mbrojtje. Polonia thotë se veprimet e saj janë të ligjshme.
Që nga fillimi i nëntorit, sipas autoriteteve polake, janë regjistruar 4300 tentativa për kalim kufitar. Roja kufitare polake tha se kishte regjistruar rreth 1.000 përpjekje për kalim në dy ditët e fundit, duke përfshirë disa përpjekje “në shkallë të gjerë” me grupe prej më shumë se 100 personash që përpiqeshin të shkelin gardhin.
Autoritetet polake kanë arrestuar një numër të vogël njerëzish, dhe i kanë kthyer menjëherë të tjerët në Bjellorusi.
Një përfaqësues i rojes kufitare polake tha për CNN në fillim të kësaj jave se disa nga emigrantët ishin shtyrë drejt barrierave nga shërbimet bjelloruse. Qasja në zonë është rreptësisht e kufizuar. Gazetarët dhe punonjësit e ndihmës janë bllokuar të udhëtojnë në zonë nga një zonë përjashtimi.
Një krizë më e madhe politike po shpërthen
Udhëheqësi i Bjellorusisë, Alexander Lukashenko, është akuzuar më parë për një krizë emigrantësh në kufi nga kryeministrat e Polonisë, Letonisë dhe Lituanisë fqinje, duke e shtyrë Poloninë të miratojë një projektligj në tetor për ndërtimin e një muri përgjatë kufirit të saj me Bjellorusinë.
Qeveria e Lukashenkos ka mohuar vazhdimisht pretendime të tilla, në vend të kësaj duke fajësuar Perëndimin për kalimet dhe trajtimin e emigrantëve.
Rusia, partneri më i madh (dhe më i rëndësishmi) politik dhe ekonomik i Bjellorusisë, ka mbrojtur trajtimin e çështjes nga Minsku, dhe ka mohuar çdo përfshirje në krizë.
Zëdhënësi i Kremlinit, Dmitry Peskov, tha të enjten se Moska “nuk ka të bëjë fare me atë që po ndodh në kufirin e Bjellorusisë dhe Polonisë”. Dhe të hënën, Peskov tha se Bjellorusia po merrte të gjitha masat e nevojshme për të vepruar ligjërisht.
Rusia nënvizoi mbështetjen e saj për regjimin e Lukashenkos, duke kryer stërvitje të përbashkëta ushtarake mbi hapësirën ajrore të Bjellorusisë të mërkurën.
Dy bombarduesit rusë me rreze të gjatë Tupolev Tu-22M3 supersonikë, praktikuan “çështjet e ndërveprimit me pikat e kontrollit tokësor” me forcat e armatosura të dy vendeve, tha të mërkurën Ministria Ruse e Mbrojtjes.
Ndërkohë, Ukraina tha se do të zhvillojë stërvitje ushtarake në një zonë pranë kufijve të saj me Poloninë dhe Bjellorusinë, për të kundërshtuar një krizë të mundshme emigrantësh, me rreth 8.500 ushtarakë dhe policë që pritet të marrin pjesë në stërvitje, së bashku me avionë ushtarakë, duke përfshirë 15 helikopterë.
Shtetet e Bashkuara dhe Bashkimi Evropian, kanë njoftuar sanksione të reja kundër Bjellorusisë këtë javë. Të mërkurën, Këshilli i Sigurisë Kombëtare i Shtëpisë së Bardhë tha se SHBA po përgatit “sanksione pasuese”, për t’i mbajtur udhëheqësit bjellorusë përgjegjës për “sulmet e vazhdueshme ndaj demokracisë, të drejtave të njeriut dhe normave ndërkombëtare”. Zëdhënësi nuk specifikoi se kur do të hyjnë në fuqi sanksionet e reja.
“Ne jemi thellësisht të shqetësuar nga veprimet çnjerëzore të regjimit të Lukashenkës, dhe dënojmë fuqishëm shfrytëzimin dhe detyrimin e tyre të pashpirt të njerëzve të cenueshëm”, tha zëdhënësi.
Ky është raundi i dytë i sanksioneve të shpallura nga SHBA në muajt e fundit. Në gusht, Shtëpia e Bardhë njoftoi një urdhër ekzekutiv gjithëpërfshirës, që synonte ata në regjimin bjellorus të përfshirë në shtypjen e të drejtave të njeriut dhe demokracisë.
Urdhri ekzekutiv u lëshua në përvjetorin e një viti të zgjedhjeve në Bjellorusi, e cila shkaktoi protesta të gjera në të gjithë vendin.
Burimi i lajmit: CNN. Përshtatur nga Tirana Today
