Pasi bllokuan qarkullimin në orët e para të ditës, banorët e zonës së Astirit janë bashkuar sërish duke iu drejtuar sheshit “Shqiponja”. Ata kanë hedhur tymuese dhe fishekzjarre në rrugë.
Protesta është përshkallëzuar pasi është lajmëruar se nesër në zonë do të vendosen mjetet e rënda, që do të shembin banesat e tyre. Qytetarët kërkojnë dëmshpërblim me vlerën e tregut për objektet, dhe jo qira 3 vjeçare siç ka paralajmëruar qeveria.
“Nuk ka asnjë fije transparencë, as nga Qeveria as Bashkia, ne sikur jemi geto afrikane, jo qytetarë të Tiranës. Edhe Avokatja e Popullit e nxori blof Qeverinë në shumë pika”, u shpreh një banor për mediat.
Ndërkohë një tjetër qytetar i prekur nga ndërtimi i aksit nga Pallati me Shigjeta deri te sheshi “Shqiponja” ka thënë: “Qeveria edhe mund të na terrorizojë, por ne me trupin e jetën tonë do i mbrojmë banesat”.
“Nuk jemi vetëm shpellarë të qeverisë. Ka ose jetë, ose vdekje”.
