Aktori i njohur Guljelm Radoja u bëri thirrje mbrëmjen e kaluar kolegëve të tij që po mbrojnë godinën e Teatrit Kombëtar, të ruajnë dinjitetin e tyre dhe të mos bëhen kukulla nën sqetullën e politikanëve.
Ndër të tjera, në fjalën e mbajtur, Radoja iu drejtua edhe artistit Robert Ndrenika, i cili ka shfaqur qëndrimin e tij pro shembjes së teatrit, duke e quajtur atë të shitur.
Ndërkohë, lidhur me këtë deklaratë, Ndrenika ka treguar për gazetën “Panorama” se kjo nuk është aspak e vërtetë, ndërsa shtoi ndër të tjera se nuk është mirë nga gjendja shëndetësore.
“Të më falni, por nuk jam mirë me shëndet. Nuk jam mirë. Unë kam bërë disa deklarata më parë, ja merrni ato. Sot e kishin shkruar në një gazetë njërën. Mendon se jam shitur?! Epo mirë, le të mendojë ashtu. Por a mund të më thotë se me se jam shitur?! E pra, kam marrë para. I thoni që kam marrë nja 200 mijë euro”, tha me ironi Ndrenika.
