Deputeti socialist Erion Braçe, i cili është ndër zërat me kritik të mazhorancës, në një intervistë për “Report Tv” ka vendosur pikat mbi ‘i” në lidhje me debatet e shumta me ministren e Bujqësisë, Frida Krifca. Braçe u shpreh se nuk ka asnjë interes personal, madje nuk synon as vendin e ndonjë ministri, por i gjithë shqetësimi i tij janë problematikat e bujqësisë. Sipas tij, ka ardhur koha që të merren reforma në bujqësi për ta zhvilluar këtë sektor.
“Skam asgjë personale me asnjë nga ata që janë të qeverisë, pavarësisht se kanë qenë në PS apo jo se s’kam asnjë interes personal. Nuk dua të jem në qeveri, as të jem ministër, nuk kam interes për karriget e cilitdo ministre, sot nesër e në vijim.
Kur më kanë kërkuar që të marr përgjegjësi e të kryej detyra, do i mendohem. Nuk kam asnjë interes personal. Nuk kam as tokë, as para për tu marrë me këtë gjë. Nuk kam interesin e ndonjë tregtari.
Shqetësimi është do mbetemi këtu, këtu jemi të prapambetur apo do bëjmë kapërcimin e madh në bujqësi? Nuk bëhet pa bujqit. Kush e mendon se bujqësia nis tek përpunuesi, e kanë gabim. A ka mundësi ta vëmë çmimin tani në bursë dhe çdo bujk në Francë e Spanjë do mbjellë duke ditur çmimin e vitit të ardhshëm. E kam me bujqësinë. E kam me reformat që duhen ndërmarrë në aspektin e bujqësisë”, tha Braçe.
Më herët, deputeti socialist, Erion Braçe thirri në interpelancë ministren Krifca, ndaj së cilës nuk i kurseu akuzat për menaxhimin e situatës. Bujqësia, çmimet e produkteve të stinës dhe mbështetja për fermerët u diskutuan në Kuvend, ku dhe pati përplasje të forta. Erion Braçe akuzoi edhe deputetë të opozitës, se në bashkëpunim me grumbullues vendosin çmime të pafavorshme për fermerët.
