Dje nisi aksioni për shembjen e banesave në lagjen “5 maji” në Tiranë. Forcat policore rrethuan zonën, pasi një pjesë e banorëve kundërshtuan shembjen e banesave të tyre. Këto apartamente po shemben në kuadër të procesit të rindërtimit pas tërmetit të 26 nëntorit 2019, dhe për këtë zonë është hartuar një plan me blloqe të reja banesash. Shumë prej banorëve e kanë kundërshtuar këtë projekt, pasi sipas tyre, shtëpitë nuk duhet të shemben sepse nuk kanë pasur dëme. Por fadromat e Inspektoratit të Mbrojtjes së Territorit nisën shembjen e 7 banesave nga 430 në total, ç’ka çoi në tensione dhe përplasje mes banorëve e policisë. Në lidhje me këtë situatë, një reagim ka ardhur nga kryeministri Rama. Në përfundim të mbledhjes së Kryesisë së PS-së, kryeministri Rama u përgjigj lidhur me tensionin në rrugën “5 Maji” në Tiranë, ku banorët kundërshtuan shembjen e banesave të tyre.
“Ato janë e do të jenë pamje të përsëritura sa herë në emër të mbrojtjes individuale do të shkelet e drejta e përbashkët, do të shkelet ligji. Unë di që të gjithë banorëve iu është dhënë qartësisht drejtim dhe qartësisht të gjitha banorët kanë mundësi të përfitojnë.
Asnjë banor nuk hidhet në rrugë, por zhvillimi i këtij vendi dhe e mira e përbashkët nuk merret peng nga askush. Kështu që sa herë do të ketë banorë që do të bëjnë këtë, aq herë do të shkojnë në polici që do bëjë detyrën e vetë. Dhe nuk është dhunë, por është ushtrimi i forcës së ligjit, për të gjitha ata që i dalin përpara shtetit, njerëzve me forcë. Kaq e thjeshtë është kjo”.
“Opinioni i të gjithë banorëve është dëgjuar me dhjetëra herë, dhe ajo që duhet t’ju interesojë juve është të verifikoni, këtë që po them. A janë këta banorë të hedhur në rrugë të madhe, apo janë këta banorë, secili me një mundësi tjetër siç i takon. Dhe unë ju them është kjo e dyta. Ne do ndërtojmë të gjitha apartamentet për të pastrehët, do të bëjmë një program kombëtar strehimi shumë më të madh që shkon shumë më tej tërmetit. Do u japim të gjithëve atë që ju takon. Po askush nuk mund t’i imponohet një komuniteti, sepse bëhet fjalë për ndërtime të paligjshme, dhe pavarësisht kësaj atyre i është ofruar kompensim. Në demokraci të gjithë kanë të drejtën për t’u dëgjuar, por nëse dëgjohen të gjithë atëherë nuk ka kurrë asnjë vendim”, u shpreh Rama.
