Eurodeputeti Knut Fleckenstein, ka folur sot lidhur me ‘përplasjen’ Rama-Meta për çështjen e Ministrit të Brendshëm. Raportuesi i PE për vendin tonë tha se nuk i di arsyet e presidentit për mosdekretimin e Lleshit. Ajo çfarë ai nënvizoi është fakti se di nga organizatat ndërkombëtare, që Lleshaj ka CV dhe është i pranueshëm.
Sipas Fleckenstein, informacioni që ai ka për Lleshin është i mirë, por fakti që nuk është dekretuar nga Meta, sipas tij, mund të ketë të bëjë me informacione të tjera më të thella.
“Informacioni që kam sa i takon Sandër Lleshit, janë të gjitha pozitive. Por nga ana tjetër nuk e di është i plotë, pasi presidenti mund të ketë informacione më të thella që çojnë në marrjen e vendimit të tij.
Nuk jam unë personi që ta kritikoj presidentin, se nuk i di arsyet. Nga organizatat ndërkombëtare pritet mirë, megjithatë kjo nuk përjashton informacione të tjera që mund të ketë presidenti. Kështu që s’mund të përgjigjem më konkretisht kësaj pyetje.
Shqipëria dhe BE kërkon që të kemi një Ministri të Brendshme që të jetë funksionale. Dhe kur themi funksionale, them ministër. I njoh këta politikanë, dhe shpresoj se do të ketë një zgjidhje për këtë çështje”, u shpreh Fleckenstein.
