Çmimi i Madh i Silverstone në Britaninë e Madhe dhuroi spektakël që me nisjen e xhiros së parë, por për fat të keq, kryesuesi i kampionatit në Formula 1 Max Verstappen u detyrua të dilte nga gara vetëm pas disa kthesave.
I nisur nga vendi i parë, Verstappen kishte mbrapa tij 7 herë kampionin e botës Lewis Hamilton, i cili ishte tepër agresiv dhe luftoi ”rrotë më rrotë” me holandezin. Të dy pilotët nuk lëshuan ndaj njëri-tjerit, dhe patën një kontakt në kthesën e shtatë, e cila rezultoi fatale për Verstappen.
Piloti i Red Bull u përplas me muret rrethuese teksa shpejtësia ishte tepër e madhe, dhe u dërgua menjëherë në spital për një kontroll të imtësishëm, por fatmirësisht gjendja e tij shëndetësore paraqitet e mirë.
Piloti i Mercedes, Hamilton u penalizua me 10 sekonda për aksidentin e shkaktuar, por ky vendim i FIA, ka shkaktuar polemika të shumta. Analistët, sportisët dhe tifozët, janë të ndarë sa i takon kësaj çështjeje.
Disa prej tyre shprehen se duhej një penalitet më i ashpër ndaj Hamilton, pasi nxorri jashtë piste Verstappen në mënyrë që të fitonte garën, por disa të tjerë mendojnë se gjithçka ishte pjesë e garës, dhe brenda kufijve të këtij sporti.
https://www.youtube.com/watch?v=Nwn1xaJW3L0
