Shtetasi Hysen Pici i cili nuk ndaloi automjetin luksoz dhe përplasi policët në Durrës, është lënë në burg. Pici aksidentoi me dashje një efektiv policie ditën e enjte në mbrëmje, pasi refuzoi t’i ndalonte patrullës policore të ngritur në lagjen numër 1, ku shtetasi në fjalë u kap në flagrancë duke ecur me shpejtësi në kundravajtje me mjetin e tij tip “Range Rover” të bardhë.
Gjatë seancës, Pici ka deklaruar se nuk ka pasur qëllim të dëmtonte policin dhe se gjithçka e ka bërë në gjaknxehtësi. Ai ka pohuar se e kishte kapur paniku, pasi ishte me armë me vete, ndaj u largua për të mos e kapur.
“Më vjen shumë keq për gjithçka ndodhi. E di që bëra gabim që u futa kundravajtje, por s’kishte makina dhe mendova t’i bija shkurt.
Në këtë moment më dolën policia përpara. Më kapi paniku, sepse kisha armë me vete dhe tentova të largohesha me qëllim mos të më kapnin me pistoletë. Më vjen keq edhe për efektivin e lënduar, nuk doja ta godisja. Kam qenë vetëm në makinë”.
