Një avion dhe një helikopter janë përplasur në ajër në jug të Anglisë, duke shkaktuar 4 viktima. Ngjarja e rëndë ka ndodhur mbi Bakingemshajër. Mediat ndërkombëtare shkruajnë se mjetet fluturuese ishin nisur nga aeroporti i Uajkombit dhe po fluturonin në kuotë të ulët.
BBC shkruan se në vendin e ngjarjes kanë mbërritur një numër zjarrfikësesh dhe ambulancash. Njëkohësisht u mobilizua edhe një dronë për gjetjen e të mbijetuarve të mundshëm. Autoritetet përkatëse kanë nisur menjëherë hetimet për zbulimin e shkaqeve të aksidentit.
Lidhur me ngjarjen, policia vendase ka deklaruar se prioritet i tyre është “shpëtimi i jetëve”. Gjithashtu forcat policore do të kontrollojnë vendin për njerëzit e përfshirë në përplasjen e avionit dhe helikopterit. “Rreth 30 personel të shërbimit zjarrfikës ndodhen në vendin e ngjarjes duke punuar së bashku me policinë dhe ambulancën”, tha një zëdhënës i zjarrfikëses.
Ndërkohë disa dëshmitarë kanë raportuar për një gjëmim të fortë në zonën e Uedisdon Menor, ndërtesa historike e Bakingemshajër.
Mitch Missen, një zjarrfikës jashtë detyre ka qenë dëshmitar i aksidentit nga kopshti i banesës së tij. “Unë ngrita sytë dhe pashë që të dy u përplasen në ajër, duke krijuar një zhurmë të madhe dhe mbeturina të shumta. Menjëherë mora çelësat e makinës dhe u nisa, ndërkohë njoftova edhe shërbimet e emergjencës, ku u tregova edhe vendin e ngjarjes”, tha ai.
“Për fat të keq unë nuk isha në gjendje që të gjeja vendin aktual të rrëzimit, por drejtova policinë, zjarrfikësit dhe ambulancën me aq sa munda. Sapo forcat e policisë ishin në vendin e ngjarjes, unë u ktheva në shtëpi. Le të shpresojmë se të gjithë janë mirë, por duke parë aksidentin, besoj se rezultati do të jetë i trishtë”, shtoi Missen. (TIRANA TODAY)
