Të paktën pesë persona kanë vdekur dhe 3500 të tjerë janë evakuuar nga shtëpitë e tyre, për shkak të vërshimeve të mëdha të ujit që goditën pjesën juglindore të Spanjës.
Sipas mediave të huaja, lumenjtë kanë dalë nga shtrati i tyre në disa zona të Valencias, Murcias dhe pjesës lindore të Andaluzisë. Këto rajone u përfshinë nga reshjet më të mëdha të shiut që janë regjistruar ndonjëherë.
Një burrë vdiq pasi u bllokua në tunelin e një autostrade. Një burrë tjetër u gjet i vdekur në fshatin Redovan në Valencia, pasi ishte larguar nga shtëpia në këmbë. Shiu i madh shkaktoi kaos në rrugë dhe transport publik, ndërsa dy aeroporte në Murcia dhe Almeria u mbyllën, duke i lënë udhëtarët të bllokuar.
Mijëra policë, zjarrfikës dhe ushtarë janë angazhuar në operacionet e shpëtimit. Disa prej tyre po përdorin barka dhe helikopterë për të arritur deri te zonat e prekura. Disa linja hekurudhore janë bllokuar dhe shumë shkolla janë mbyllur në Valencia, duke lënë pa mësim gati 700 mijë nxënës.
https://www.youtube.com/watch?v=5faG_8pjkG8
