Moti i keq ka përfshirë Romën. Mediat italiane raportojnë se reshje të mëdha shiu janë shoqëruar me një breshër të fortë, duke zbardhur rrugët e Romës. Për shkak të kësaj situate kaotike, me dhjetëra banesa kanë mbetur pa energji elektrike.
Sfera akulli kanë mbuluar rrugët, duke bllokuar lëvizjen e mjaft makinave e mjeteve urbane, si dhe kanë vënë në vështirësi mjaft drejtues automjetesh.
Në disa zona të qytetit janë përmbytur rrugë e shtëpi. Uji ka arritur deri në 30 cm thellësi e në Drejtorinë e Mbrojtjes Civile kanë mbërritur me qindra telefonata të qytetarëve që kërkojnë ndihmë. Pas reshjeve të shumta të shiut dhe breshërit, mëngjesi i sotëm ka shënuar një ulje drastike të temperaturave, deri në 8-10 gradë celsius.
