Charlie Gard u nda nga jeta mbrëmjen e djeshme në Britani, duke përlotur botën. Fëmija 11-muajsh vuante nga një sëmundje tepër e rrallë që shkaktonte dëmtim progresiv truri dhe dobësim muskulor.
Mes prindërve të tij Connie Yates dhe Chris Gard, dhe Spitalit Great Ormond Street (GOSH) kishte nisur një betejë ligjore. Prindërit e Charlie Gard luftuan për ta dërguar foshnjën në SHBA për trajtim, deri në momentin që neurologu amerikan Michio Hirano tha se ishte shumë vonë për të funksionuar.
Lajmin e hidhur e dha Yates në një deklaratë publike, duke thënë: “Djali ynë i bukur na la, jemi shumë krenarë për ty Charlie”.
Humbjen e foshnjës Charlie e komentuan edhe liderët botërorë të cilët shprehën keqardhjen e tyre, përfshirë Kryeministren britanike Theresa May, Papa Françeskun, Zv/Presidentin amerikan etj.
“Jam thellësisht e hidhëruar nga vdekja e Charlie Gardit. Mendimet dhe lutjet e mija janë me prindërit e Charlit në këtë kohë të vështirë për ta”, tha May.
“Ati ynë e pastë nën kujdesje Charlin. Lutem për prindërit e tij dhe të gjithë ata që e deshën”, shkroi Papa Franesku në një postim në Twitter.
Edhe zv/Presidenti amerikan, Mike Pence shprehu ngushëllimet e tij më të sinqerta për prindërit e Charlit.
Të enjten prindërve të Charlit iu mohua dëshira e tyre për të kaluar më shumë kohë me të birin pasi Gjykata e Lartë vendosi që i vogli do të dërgohej në një shtëpi kujdesi dhe më pas t’i hiqeshin edhe pajisjet që e mbanin në jetë, me argumentimin se nuk kishte shpresa jete dhe se gjatë kohës që ishte në jetë ai vetëm sa vuante. Prindërit kërkuan që ta dërgonin fëmijën në SHBA për trajtim por specialistët e Spitalit në Britani këmbëngulën se trajtimi i atjeshëm ishte eksperimental dhe vetëm sa do t’i shtonte vuajtjet fëmijës, pasi ai kishte dëmtime të pakurueshme në tru.
Qindra e mijëra njerëz ofruan mbështetjen e tyre për Charlin, duke krijuar një “Ushtri të Charlit” dhe duke mbledhur 1.35 milionë paund britanikë për kurimin e tij.
Agjencitë më të mëdha të lajmeve në botë e publikuan vdekjen e tij si lajm të fundit për shkak të popullaritetit që kishte fituar çështja e tij.
