Edhe një herë tjetër, kreu demokrat Lulzim Basha, ka trumbetuar se qeveria është e lidhur me krimin, deri në kupolat më të larta. Në një bashkëbisedim me gazetarët, ai tha se asgjë nuk është rastësore. Basha shtoi se në vend të shtabeve elektorale, Rilindja krijoi shtabe kriminale për blerjen e votës. Po kështu kreu i PD u ndal edhe në emra konkretë nga radhët e PS-së, që sipas tij, kanë bashkëpunuar me krimin. Në vazhdën e akuzave, kreu i PD-së tha se Rama ka ndalur së qeverisuri vendin, dhe se pushtetin e përdor për të mbrojtur lidhjet e tij me krimin. Kryetari i Partisë Demokratike preku edhe çështjen e Xhafaj.
“Ngjarjet e fundit dëshmojnë se nuk është rastësore, por e shtrirë në gjithë vendin. Dhe ka kapur kupolën e Rilindjes bashkëpunimi strategjik me krimin e organizuar për rekrutimin. Për të manipuluar zgjedhjet, mbajtur dhe marrë pushtetin.
Në vend të shtabeve elektorale, Rilindja krijoi shtabe kriminale për blerjen e votës. Sot kundërshtari ynë politik, PS është e kapur nga krimi. Nuk ka drejtues të mos ketë bashkëpunuar apo të mos jetë eksponent, nga Balla, Gjiknuri, Dako, Sejdini, Ulsi Manja e me radhë.
Rama ka ndalur së qeverisuri vendin. Pushtetin e përdor për të mbrojtur lidhjet e tij me krimin. Qeveria është kosto për shqiptarët, dhe burim rrezik që do sjellë të këqija për vendin. Detyra kryesore e PD, medias, qytetarëve është të vazhdojmë përpjekjet kundër krimit.
Fatmir Xhafa nuk duhet të shpëtojë se dha dorëheqjen. Duhet të hetohet për manipulimin e dëshmitarit të rremë, duke përfshirë drejtësinë dhe prokurorinë. Bashkë me të Ardi Veliu dhe të gjithë. Të përfshirët në këtë krim, dhe Balla që ishte garanti i këtij operacioni, sipas tableteve të përgjimit nga Prokuroria.
Arrestimi i Dakos sipas propozimit të grupit të hetimit, është hap i paevitueshëm që faktohet para shqiptarëve. As Dako, as Roshi, as Gent Daja dhe as eksponentët e tjerë të dosjes 339 nuk hetohen në liri. Përgjimet që janë bërë publike, janë vetëm maja e ajsbergut.
Dako ka bashkëpunuar direkt me krimin për pushtet dhe para. Balla duhet te merret urgjent i pandehur dhe te hetohet për të gjitha çështjet. Nga bashkëpunimi me Edmond Begon, që ka çuar në thyerjen e një sërë ligjesh, te Toyota Yaris, te Xhisiela, bashkëpunimi me bandat e Elbasanit.
Saimir Tahiri duhet hetuar në thellësi. Të heqin dorë nga skenari, të hetohet për krime të lehta dhe jo trafikun e drogës. Ai është eksponent direkt i trafikut të drogës. Këto janë prioritete absolutë. Dhe padyshim në këtë rrafsh PD dhe unë do të vazhdojmë betejën deri në largimin e Ramës.
Pa dekriminalizimin e zgjedhjeve, dhe pa ndarje e politikës nga krimi në vend, nuk do të ketë asnjë sekondë, asnjë ditë, për proces normal politik. Ky ka marrë fund kur Rama vendosi të bashkëpunojë me krimin për të ardhur në pushtet”.
