Kryeministri Edi Rama ka komentuar daljen e përgjimeve të Bild, lidhur me shit-blerjen e votave në zgjedhjet e 2017-ës.
Duke iu referuar këtij skandali, Rama sulmoi opozitën për të cilën tha se po i përdor përgjimet me qëllimin e vetëm për të dëmtuar rrugën e integrimit të Shqipërisë në BE.
Po ashtu, kryeministri tha se dalja e përgjimeve në këtë kohë nuk është aspak rastësi dhe se marrja peng e procesit zgjedhor është një orvatje për t’i mbyllur Shqipërisë derën e integrimit.
Fjala e Ramës në Kuvend:
Më aktuale se asnjëherë është orvatja e Haxhi Qamilëve të sotëm për të hedhur në erë urën e ndërtuar me shumë mundim në dekada për t’u lidhur më në fund me Evropën duke u ulur në tryezën e bisedimeve për anëtarësim. Kjo çështje nuk është më çështje legjislacioni, pasi Shqipëria thuajse e ka mbyllur, por është çështje zbatimi e legjislacionit.
Sistemi i drejtësisë duhet të jetë i gatshëm të prodhojë aftësinë e vet për të hetuar presidenti, ish-presidentë, kryeministrin, ish-kryeministrat, ministrat, ish-ministrat e kështu me radhë,.
Kjo është arsyeja themelore e gjithë kësaj orvatjeje ku bashkohen ankthi dhe drejtësi për frikën nga zgjedhjet.
Si më mirë për të realizuar këtë sesa duke marrë peng procesin zgjedhor? Marrja peng e procesit zgjedhor është orvatje për t’i mbyllur Shqipërisë derën e integrimit.
I gjithë plani me përgjime të pahetuara dhe të mbyllura na kasafortë e më pas të dorëzuara te PD, gjetja e vendit pikërisht në Gjermani, kalendari i daljes së përgjimeve aspak i përputhur me kalendarin e protestave, flasin vet. Është një revolucion imagjinar me punonjës bashkie, të rinj që maskohen por që funksionon në raport me qëllimin sepse prodhon pamje të shëmtuara, krejtësisht të papërputhshme me atë të një vendi që është gati për të hapur negociatat.
