Ka përfunduar takimi i mbajtur në Bruksel mes presidentit Hashim Thaçi dhe atij serb, Aleksander Vuçiç, me ndërmjetësimin e kryediplomates evropiane, Federica Mogherini.
Pas takimit, të dy presidentët kanë folur për mediat, ku konfirmuan se kanë arritur dakordësinë për të kryer takime më të shpeshta mes tyre.
Vuçiç konfirmoi se presidentët biseduan hapur mbi marrëdhëniet afatgjata në mes të serbëve dhe shqiptarëve.
Gjatë takimit, kreu i shtetit serb hapi gjithashtu edhe çështjen e arrestimit të Bogdan Mitroviqit në Suharekë, transmeton Klan Kosova.
Ndërkohë, presidenti i Kosovës Hashim Thaçi ka thënë pas takimit se sot mes dy vendeve ka komunikim më normal se më herët.
“Marrëveshja përfundimtare do të jetë ndihmuese për njërën dhe tjetrën palë. Çdo marrëveshje në përputhje me vullnetin e popullit. Marrëveshja nënkupton stabilitetin për tërë Ballkanin Perëndimor”, tha Thaçi.
Kreu i Kosovës përfitoi nga rasti për t’u bërë thirrje partive politike në Kosovë që të formojnë sa më shpejtë institucionet.
“Ftoj spektrin politik t’i krijojë institucionet, që Kosova të përfaqësohet përmes Grupit të Unitetit. Pajtohem që të kem takime më të shpeshta me Vuçiç në muajt në vijim”, ka deklaruar Thaçi.
