Mbledhja e Këshillit Politik ka përfunduar pa konsensus gjatë mesditës së sotme. Damian Gjiknuri, në një deklaratë për mediat tha se opozita erdhi me të njëjtat qëndrime. Ai kërkoi nga ana e opozitës, që të vijë me propozime konkrete.
“Hajdeni me propozime konkrete. Zonja Hajdari ka një draft, të vijnë edhe ata. Ky këshill është bërë për të diskutuar me opozitën jashtë parlamentare. Në Këshill duhet të vijnë me propozime dhe jo me studio e deklarata, por të shkruar në letër.
Tentativat përsëriten të njëjtat letra, njëherë në shqip e njëherë në anglisht, që bëhen vetëm për të minuar këtë proces. Ne nuk do ta lejojmë këtë, në ditët që mbeten ne jemi të gatshëm 24 orë për propozimet e tyre, si të duan ata”, deklaroi Gjiknuri.
Në mbledhjen e sotme, opozita ka paraqitur kërkesën konkrete për të marrë ndihmën e OSBE/ODIHR-it. Janë 5 pyetje që demokratët dhe aleatët e tyre i drejtojnë organizatës ndërkombëtare për ndihmë. Ato kanë të bëjnë me formulën e koalicioneve, shpërndarjes së mandateve, listat e hapura dhe barazinë gjinore dhe nëse ndryshimi i rregullave 6 muaj para zgjedhjeve cënon procesin.
Përfaqësuesi i mazhorancës në Këshillin Politik, Damian Gjiknuri, e ka cilësuar si vazhdim të retorikës politike letrën që PD do i dërgojë OSBE-ODIHR. Për këtë arsye ai ka refuzuar ta firmosë. Gjiknuri vijon të këmbëngul se nuk mund të shkohet te ODIHR pa propozime konkrete.
