Kryeministri grek Kyriakos Mitsotakis zhvilloi këtë të mërkurë një takim me përfaqësuesit e Unionit Demokratik të Minoritetit Grek – Omonia dhe të Partisë Bashkimi për të Drejtat e Njeriut, që mbështet pakicën greke në Shqipëri. Ku pjesëmarrës ishin presidenti i Omonia-s, Vasilis Kagios, kreu i PBDNj, Vangjel Dule, si dhe kryetari i degës Omonia në Himarë, Fredi Beleri.
Sipas agjencisë greke të lajmeve “ANA”, përfaqësuesit e pakicës greke treguan problemet që hasin në Shqipëri. Një nga çështjet më shqetësuese është aftësia e tyre për të ushtruar lirshëm të drejtën për vetëvendosje.
Po ashtu, në fokus të bisedimeve ishte zgjidhja për çështjen e pronës. Në takim u diskutua edhe për edukimin, përdorimin e gjuhës greke, çështjet e pensioneve dhe sigurimeve për grekët në Shqipëri. Si dhe mbështetja për sipërmarrësit e rinj nga komuniteti grek, që duan të fillojnë aktivitete biznesi në Shqipëri.
Nuk munguan falenderimet dhe vlerësimet nga ana e përfaqësuesve të minoriteteve drejtuar qeverisë greke. Ndërsa Mitsotakis premtoi se shumë shpejt do të vizitojë zonat e banuara nga pakica.
Ndër të tjera, ai u shpreh se do të jetë në krah të tyre, duke nënvizuar se përparimi dhe prosperiteti i pakicës greke është një përparësi dhe çështje kryesore në rendin e ditës sa i përket marrëdhënieve dhe dialogut midis Greqisë dhe Shqipërisë.
