Edhe sot është tensionuar situata lidhur me protestën e banorëve të Astirit. Ata kanë lëshuar thirrje ndaj qeverisë që të ndërgjegjësohen, e mos ti shkatërrojnë banesat. Banorët në një zë kanë thënë se nëse prishen shtëpitë, ata do të shtrihen në mes të rrugës, duke paralajmëruar edhe për vdekje.
Situata ka agravuar edhe më tej, kur një prej qytetarëve është akuzuar si i shitur nga ana e banorëve të tjerë, të cilët po protestojnë. Një prej pjesëmarrësve në protestë, i cili pretendonte se ishte banor i zonës, u shpreh kundër bllokimit të rrugës.
Kujtojmë se kjo është dita e 15-të e protestës së tyre.
Pjesë nga debati:
Banori: Unë them që këtu duhet të vijë një përfaqësi nga ana e shtetit. Këtu nuk ka zgjidhje në këtë mënyrë, ne duhet të mblidhemi dhe të diskutojmë. Unë nuk dua të rrinë ato makinat atje, po dhe ne kemi hall.
Banorët e tjerë: Nuk ka shtet, xhaxh! Kemi 15 ditë në rrugë dhe nuk na ka ardhur asnjë njeri nga ana e shtetit. Këtu vendosim ne!
Banori: Nuk mund të shkojmë të gjithë në takim! Kjo nuk është zgjidhje. Nuk ka këtu pa shtet, ne duhet të kërkojmë një përfaqësi nga shteti jonë!
Banorët e tjerë: Je i shitur, ik në shtëpi, ik. Sa lekë të kanë dhënë?! Ik, ik, ik! Nuk u ngope 50 vjet me Enverin!
Sipas banorëve të tjerë, personi që mori fjalën është pronar i një pallati disakatësh që ndodhet në zonë. Pretendohet se ai është futur nga ana e qeverisë, në mënyrë që të përçajë protestën e tyre.
https://tiranatoday.com/ska-qe-i-prish-keto-shtepi-banoret-e-astirit-banesat-do-lahen-me/
