Studentët protestues sot thuhet se janë ndarë në dy grupe. Një pjesë janë mbledhur përpara Ministrisë së Arsimit dhe një pjesë tjetër përpara Kryeministrisë.
Studentët të cilët vijnë të protestojnë përpara Ministrisë së Arsimit janë dëgjuar të shprehen se: “Protesta është këtu!”.
Sot, studentët kanë thirrur këtë të mërkurë një protestë ndryshe nga gjithë këto ditët e fundit, të heshtur e vetëm me libra dhe fletë të bardha, pa parulla dhe as thirrje në kor, siç njoftohet.
E pas përçarjes së një dite më parë, me grupe të ndryshme studentësh që mbetën përpara Ministrisë së Arsimit, të tjerë që shkuan përpara Kryeministrisë, ndërsa një grup i tretë bllokoi trafikun e automjeteve në rrethrrotullimin e “Zogut të Zi”, studentët kanë vendosur që përmes një sondazhi “online” të vendosin vendin ku do të pozicionohen.
Votat shkuan 64% në favor të qëndrimit përpara Ministrisë së Arsimit, duke plotësuar kështu argumentin e atyre që thoshin një ditë më parë se, përderisa kauza jonë është tërësisht mbi arsimin, “nuk kemi përse të shkojmë para Kryeministrisë, apo të bllokojmë rrugët”.
Pritet tashmë që të nisë grumbullimi pranë fakulteteve respektive, përpara MASR-së. Një ditë më parë skadoi afati i vendosur nga studentët për plotësimin e kërkesave nga qeveria.
Ndërkohë, gjatë natës, një pjesë e studentëve qëndruan para Kryeministrisë, ku ndezën edhe një zjarr, sikurse bënë edhe një grup më i vogël të “Zogu i Zi” darkën vonë.
