E prekur nga tragjedia që pushtoi Shqipërinë më 26 nëntor, një vajzë e vogël nga Agorda iu drejtua me një letër vullnetarëve të Mbrojtjes Civile. Ndërsa brenda në zarf kishte futur edhe 5 euro.
“E dashur Mbrojtja Civile e Bellunos
Unë jam Emily dhe po ju shkruaj sepse sot në mëngjes, sapo u zgjova, dëgjova një lajm të keq në emisionin e lajmeve. Mami, e cila po pinte kafenë, më shpjegoi se në Shqipëri ka pasur një tërmet shumë të fortë.
Më shkoi mendja te të gjithë fëmijët që flinin në krevatet e ngrohtë, pranë mamit e babit apo me vëllezërit e motrat. Do jenë trembur shumë. Më vjen shumë keq, shpresoj të mos dëgjoj më nga këtë lajme.
Nga frika, ata fëmijë nuk do kenë ngrënë as mëngjes.
Unë nuk jam shqiptare, por do të doja t’u thosha atyre fëmijëve që dua të jem shoqja e tyre e zemrës. Nuk di se si, por do të doja që ju të Mbrojtjes Civile të më ndihmonit t’u dërgoj fëmijëve të Shqipërisë vizatimin tim, kështu që të mund ta shohin që kam menduar për ta dhe që më vjen shumë keq për atë që ka ndodhur.
Shpresoj që të jenë përsëri të qetë e të lumtur me familjet e tyre. Përshëndetje fëmijë shqiptarë. Po ju dërgoj edhe 5 euro, që të mund të hani mëngjes nesër”, shkruhet në letrën e vogëlushes.
Ndërkohë, kryetari i Provincës së Bellunos, Roberto Padrin u shpreh se këtë letër e gjeti mbi tavolinën e tij, ndërsa shtoi se solidariteti i përcjellë në këto ngjarje është një shembull i mirë.
