Pas pothuajse 100 ditësh në zyrë, duket se lavdia e të qenit president është zhdukur për Donald Trump.
Por, a është penduar Trump për postin që mban?
“Unë e doja jetën time të mëparshme. Gjithçka po shkonte shumë mirë. Kjo është një përgjegjësi shumë më e madhe dhe unë mendoja se do të ishte më e thjeshtë”, kështu ka thënë Trump, i cili duket se e ka menduar postin e presidentit si një punë jo shumë të vështirë.
Edhe pse Trump ishte mësuar me mungesën e privatësisë, ai është habitur se çfarë ndryshimi kishte tani që mban postin e kreut të SHBA-ve.
Mbrojtja 24-orëshe e Shërbimit Sekret duket se e bezdis Trump-in, i cili është shprehur se e ka marrë malli të ngasë makinën.
“Mua më pëlqen të ngas makinën, por tani nuk mundem më”, tha presidenti duke kujtuar me nostalgji kohët “e vjetra”.
Megjithatë, shumë aspekte të karakterit të Trump nuk kanë ndryshuar, pasi ai takon shpesh miqtë e tij dhe ish-kolegët e bizneseve, të cilëve u jep herë pas here këshilla.
Pas një marrëdhënieje “lufte” me mediet, që nga fushata e tij e zgjedhjeve presidenciale, Trump vendosi të mos marrë pjesë në Darkën e Korrespondentëve të Shtëpisë së Bardhë, në Washington, të shtunën.
Ai u shpreh se edhe pse është trajtuar në mënyrë të padrejtë nga mediet, herën tjetër do marrë pjesë në këtë darkë. /Tirana Today
