Pediatrja Lira Gjika ka dhënë alarmin lidhur me lojën “Balena Blu”, e cila ka marrë disa jetë të rinjsh, duke i çuar ata në vetëvrasje.
Gjika shpjegon se si shumë të rinj bien pre e kësaj loje, teksa manipulohen dhe shfrytëzohen papjekuritë psikoemocionale të adoleshentit.
Më tej, pediatrja shkruan se loja shfrytëzon elemente të caktuara si frikë për të mos dështuar, kuriozitetin për limitetet e jetës apo paaftësinë për të kuptuar vdekjen, deri sa bien në kurth duke shkuar në vetëflijim.
POSTIMI I PEDIATRES:
Balena Blu
Në emisione televizive dhe rrjetet sociale, po flitet shumë për “balenën blu”, këtë lojë të frikshme që e dërgon lojtarin, natyrisht adoleshent, drejt vdekjes. Nuk është shaka, por produkt i mëndjeve diabolike që nëpërmjet lojës dhe anonimatit, ndihen të pushtetshëm ndaj jetës së tjetrit. Kjo lojë bazohet në manipulimin dhe shfrytëzimin e papjekurisë psikoemocionale të adoleshentit. Frika se mos jetë i dështuar, kurioziteti për limitet e jetës dhe vdekjes dhe mbi të gjitha paaftësia për të kuptuar vdekjen si fund përgjithmonë. Këto janë elementët që shfrytëzon kjo lojë. Loja është një kurth për jetën dhe operon në zona të ndërmjetme të psihës të cilat vetë lojtari nuk i njeh dhe nuk kupton . Këtu qëndron edhe ligësia e personave që e kanë krijuar. Këto lojra e nxitin lojtarin dhe e futin në labirinthe që ndërtojnë varësi totale ndaj lojës apo më saktë, e çojnë lojtarin deri në skllavëri ndaj lojës. Pasi arrihet pushteti i plotë fillon dhe zbatohet skenari i realizimit të aktit final vetëvrasjes. Specialistët tërheqin vëmëndjen se manipulimi i lojtarit, ti bindet çdo urdhri me vullnetin e tij apo mos të ketë tjetër zgjidhje vetëm urdhrit të lojës, është i ndërtuar aq heshturazi sa adoleshenti nuk e ndjen manipulimin, por thjesht bindet. Edhe një gjë, nuk është e para lojë e tillë, të paktën kjo lojë po denoncohet. Lira Gjika
