Parlamenti Europian ka votuar pro raportit për integrimin e Shqipërisë në BE. Ky lajm është përcjellë nga kreu i grupit parlamentar të PS-së, Taulant Balla. Përmes një postimi në ‘Twitter’, Balla bën me dije se raporti në fjalë është hartuar nga eurodeputeti Kunt Fleckenstein.
Mësohet se PE i ka dhënë mbështetje rekomandimit për çeljen e negociatave për në BE. “Parlamenti Europian sapo votoi me 459 vota raportin 2018 për Shqipërinë #KnutFleckenstein, i cili mbështet plotësisht rekomandimin e Komisionit Europian që #NEGOCIATAT_PËR_ANËTARËSIM duhet të hapen në njohje të përpjekjeve reformuese të bëra nga Shqipëria #Qershor2019”.
Siç duket, Shqipëria ka bërë progrese në rrugën e integrimit europian. Por institucionet e pavarura në arkitekturën e re të drejtësisë duhet të jenë funksionale dhe lufta kundër krimit të organizuar dhe korrupsionit duhet të vijohet me rezultate të mëtejshme konkrete.
Ky është mesazhi që kanë dhënë 3 institucionet kyçe europiane, gjatë debatit në seancën plenare të Parlamentit Europian mbi progresin e integrimit europian të Shqipërisë në 2018.
Knut Fleckenstein, eurodeputet: “Presim që qeveria shqiptare të bëjë progresin e duhur, deri në marrjen e vendimit të pritshëm për hapjen e negociatave të anëtarësimit në qershor të vitit të ardhshëm. Gjithashtu shpresojmë që Këshilli i Ministrave do t’i mbahet fjalës së tij për hapjen e negociatave verën e ardhshme.
Çdo gjë tjetër do të ishte kundra-produktive dhe do të ishte e pakuptimtë, pasi do të cënonte stabilitetin e gjithë rajonit. Reforma e Drejtësisë ka filluar të japë rezultatet e para, por kërkohet vijimi i saj si edhe rezultate të mëtejshme në luftën kundër krimit dhe korrupsionit. Ndër çështjet urgjente do të rradhisja realizimin e reformës zgjedhore, sipas rekomandimeve të OSBE/ODHIR që duhet të përfundojë para zgjedhjeve lokale të 2019”.
https://tiranatoday.com/parlamenti-europian-voton-raportin-e-integrimit-te-shqiperise-ne-be/
