Një ditë më parë, PD zyrtarizoi koalicionin me PDIU-në e drejtuar nga Shpëtim Idrizi. Pas një ore takimi të zhvilluar mes dy kryetarëve dhe drejtuesve të tjerë partiakë, palët njoftuan se PDIU-ja, e cila në themel të programit të saj ka çëshjen çame, do të rreshtohet në frontin opozitar.
Pasi kaluan orët e ethshme, është kryetarja e LSI-së, Monika Kryemadhi, e cila duke dhënë vlerësimin e saj, e cilëson si një zhvillim pozitiv. Përmes një komenti, Kryemadhi nënvizon ndër të tjera se ‘afrimi i PDIU-së në koalicionin opozitar, është padyshim një zhvillim pozitiv në përpjekjet për të çmontuar dhe për t’u përballur me qeverinë banditeske të Edi Ramës’.
Po kështu, ajo nuk lë pa përmendur faktin se afrimi i PDIU-së në koalicionin opozitar, është një shenjë e mbarë se opozita e bashkuar po shkon drejt zgjerimit dhe unifikimit të qëndrimit të saj, me një spektër më të gjerë të politikës.
