Partia Demorkatike do të mbledhë Kuvendin Kombëtar të shtunën e 17 korrikut. Kuvendi Kombëtar i partisë më të madhe opozitare do të zhvillohet në orën 10:30 në ambientet e Pallatit të Kongreseve.
”I nderuar anetar i Kuvendit Kombetar te PD, Ju njoftojme se mbledhja e Kuvendit do te zhvillohet diten e shtune, date 17.07.2021, ora 10:30, ne ambientet e Pallatit te Kongreseve ne Tirane. Ju lutemi te jeni prezent dhe me vete te keni karten tuaj te identitetit. Sekretariati Organizativ i Partise.”, thuhet në mesazhin drejtuar anëtarësisë.
Gjatë rendit të ditës së Kuvendit Kombëtar, do të informohet për masakrën zgjedhore të 25 Prillit dhe do të përcaktohen linjat kryesore të strategjisë politike të PD.
Në pikën e dytë është parashikuar që të vlerësohet mundësia për ndryshime në statutin e PD-së, ndërsa në pikën e tretë të rendit të Kuvendit është përcaktuar zgjedhja e Këshillit Kombëtar të PD-së që aktualisht drejtohet nga Bujar Nishani.
